ଅପହର୍ତ୍ତା
ଅପହର୍ତ୍ତା
ଅପହର୍ତ୍ତା
ପ୍ରମୋଦ ପ୍ରଧାନ
ହେ ମୁଷ୍ଟିମେୟ ରାଜନେତା,
ପଥଭ୍ରଷ୍ଟ ସ୍ୱାର୍ଥବାଦୀ ରାଜନୀତି ଦଳ!
'ବନ୍ଦ’ର ଆଳରେ,
ନିଜ ଚେତନାରେ ଆଉ ଢାଳନା କଳା କାଳି,
ବିପର୍ଯ୍ୟସ୍ତ କରି ଦେଶର ଅର୍ଥନୀତି,
କୋଟିକୋଟି ଲୋକଙ୍କ ଭବିଷ୍ୟତ
ବାରବାର ଦିଅନା ଦଳି ।
ସବୁ ଜଣା ତୁମ ପାରିବାପଣିଆ,
ତୁମେସବୁ ଗୋଟେଗୋଟେ
ଗୁଣଗାରିମା ଛେଉଣ୍ଡ ଗୁଣିଆ,
ସୁନେଲି ସ୍ୱପ୍ନରେ ବିଭୋର ତୁମ ଆତ୍ମସିଦ୍ଧି,
ମୁଣ୍ଡରେ ନକଲି ଗୁଣିଆର
ଗୋଛାଗୋଛା ବିକଳାଙ୍ଗ ବୁଦ୍ଧି ।
ବିକଶିତ ବୁଦ୍ଧି ବଳେ
ବୃଦ୍ଧି ହୁଏ ଜୀବନର ମାନ,
ଫେରିଆସେ ହୃତ ଗୌରବ ସମ୍ମାନ,
ଗୌରବାନ୍ୱିତ କର କୋଣ-ଅନୁକୋଣେ
ଦେଶର ମାଟି-ଗୋଡ଼ି-ପାଣି-ପବନ
ପୋଡ଼ିଦେଇ କଳୁଷିତ ସମ୍ମୋହନ ।
ହେ ସୁଧିବୃନ୍ଦ, ଦେଶର ଭାଗ୍ୟବିଧାତା!
ସମୟର କଷଟିରେ ମୁହଁ ଖୋଲି, ଦିଅ ବାର୍ତ୍ତା,
ଆଉ ଡେରି କିଆଁ...?
ଜାଳିଦିଅ ନିଆଁ କଳଙ୍କିତ ପୃଷ୍ଠେ,
ଇତିହାସ ପୃଷ୍ଠାରୁ ଲିଭିଯାଉ ଅପହର୍ତ୍ତା !
ଫ୍ରେଣ୍ଡସ୍ କଲୋନୀ, କଟକ
ଫୋନ : ୯୪୩୭୧୮୨୭୮୫
*****