ଦଶହରା ପର୍ବ
ଦଶହରା ପର୍ବ
ଦଶରଥ ପୁତ୍ରବଧୂ ଜନକ ନନ୍ଦିନୀ
ଦଶମଥା ଚୋରି କଲା କାଳକୁ ବରଣୀ ।
ଦାଶରଥୀ ସେତୁ ବାନ୍ଧି ଲଂକା କଟକକୁ
ଦଶମଥା ଆସି ଯଜ୍ଞ ପୁରୋଧା ପଣକୁ ।
ଦଶଶିର ଯୁଦ୍ଧ କଲା ପୁତ୍ର ନାତି ଧରି
ଦାଶରଥି ସମସ୍ତଂକୁ ପକାଇଲେ ମାରି ।
ଦଶା ପଡ଼ିଲା ପରାୟେ ଚିନ୍ତି ଅଘଟଣ
ଦଶମଥା ବ୍ରହ୍ମଶରେ ହୋଇବ ନିଧନ !
ଦାଶରଥି ଣରଣ ପଶିଲେ ଦୁର୍ଗାଙ୍କର
ଦଶଭୂଜା ଆରାଧନା ପାଇଁ ଅଗ୍ରସର ।
ଦଶ ଦଶା ଅଷ୍ଟ ପଦ୍ମ ଦେଇ କଲେ ଭକ୍ତି
ଦଶ ମହାବିଦ୍ୟା ଦେବୀ ମାୟାବଳେ ଅତି
ଦଶା ଦେଇ ଏକ ପଦ୍ମ କରିଲେ ହରଣ
ଦାଶରଥି କରିବେକି ଚକ୍ଷୁ ଉତ୍ପାଟନ !
ଦଶଭୂଜା ଡାକ ଦେଲେ ପାଇଲି ପାଇଲି
ଦଶମଥା ନାଶ ଯିବ ଆଶୀର୍ବାଦ ଦେଲି ।
ଦଶହରା ତିଥି ସେତ ବିଜୟା ଦଶମୀ
ଦାଶରଥି ହର୍ଷ ହେଲେ ପାଇ ଆଶୀର୍ବାଣୀ ।
ଦଶମଥା ବ୍ରହ୍ମଶରେ ହୋଇଲା ନିଧନ
ଦଶଭୂଜା କୃପାକଲେ କିଅବା ଅପୂର୍ଣ୍ଣ !
ଦଶପ୍ରହରଣ ଧାରୀ ଜଗତର ମାତା
ଦଶହରା ଆଣୁ ଶାନ୍ତି ସଂହତି ବାରତା ।
ବିଶ୍ବେଶ୍ୱର
(ଦଶ ଦଶା ଅଷ୍ଟ = ଶହେ ଆଠ)