ବୋଉ
ବୋଉ
ଦୁନିଆ କୁ ଟିକେ ଦେଖିବା ଆଗରୁ
ତୁ ଚାଲି ଗଲୁ ତୋ ବାଟରେ
ଏକା କରି ମୋତେ ଛାଡ଼ି ଦେଇ ଗଲୁ
ମଣିଷ ମାନଙ୍କ ଏଇ ହାଟରେ।
ମଣିଷ ହାଟରେ ଭିଡ଼ ତ ଲାଗିଛି
ତୋତେ ଲୋ ବୋଉ ମୁଁ ଖୋଜି ପାଉନି
ଖୋଜି ଖୋଜି ଦିନ କେବେ ସରିଯିବ
ତଥାପି କାହିଁକି ଖୋଜା ସରୁନି।
କିଏ କହେ ତାକୁ କାହିଁକି ଖୋଜୁଛୁ
ସିଏ କଣ ତୋତେ ମିଳିବ ଆଉ
ଜୁଇ ରେ ପାଉଁଶ ହେଇଗଲା ପରେ
ତେବେ କଣ ଆଉ ଫେରିବ ବୋଉ।
ଫେରି ଆସିବେନି ବୋଉ କେବେ ମୋର
ହାଟର ଭିଡ଼ ଟା ସରିବା ଯାଏ
କେଜାଣି କାହିଁକି ମନ ବୁଝୁନାହିଁ
ଖୋଜୁ ଥିବି ଶେଷ ନିଶ୍ୱାସ ଯାଏ।
@ରଜୀତ ଦାସ,କୁଜଙ୍ଗ, ପାରାଦ୍ୱୀପ