ଦିଶୁଅଛି ଜଳଜଳ

ଅକ୍ରୁର ଆସିଛି ନେଇଯିବ ତାଙ୍କୁ

କେହ୍ନେ ରୋକିବା ଗୋ ସଖୀ,

ଶୁଣିଦେଲା କ୍ଷଣି,ହୃଦ ହୁଏ ହାଣି

ଶୁଖୁନାହିଁ ଜମା ଆଖି -

ଏବେ,କି ବୁଦ୍ଧି କୁହ କରିବା...

ଆମ୍ଭେ କେମନ୍ତେ ପ୍ରାଣ ଧରିବା,ଗୋ-

ଏବେ,କି ବୁଦ୍ଧି କୁହ କରିବା ।

ସେ ମୋହନ ବିନା ସାରା ଗୋପପୁର

ହୋଇଯିବ ହତଶିରି ,

ଯମୁନାର କୂଳ, ଏ କଦମ୍ବ ମୂଳ

ବୃନ୍ଦାବନ ହେବ ଝୁରି-

ସବୁ,ଦିଶୁଅଛି ଜଳଜଳ....

ତାଙ୍କ ବିନା କାନ୍ଦିବେ ଗୋ-କୁଳ,ଗୋ-

ସବୁ,ଦିଶୁଅଛି ଜଳଜଳ ।

କା' ସଙ୍ଗେ ଅବିର ହେବା ବୋଳାବୋଳି

କା' ସଙ୍ଗେ ରଚିବା ରାସ,

କାହାକୁ ଗୋ ସଖୀ,ଖୁଆଇବା ଡାକି

ସର,ଲବଣି ଗୋରସ-

ଆଉ,କା'ରେ ଦେବା ମିଠା ଗାଳି....

କୁଞ୍ଜବନେ କେ ପିନ୍ଧିବ ମାଳି,ଗୋ-

ଆଉ କା'ରେ ଦେବା ମିଠା ଗାଳି ।

ଚାଲ,ଅକ୍ରୁରଙ୍କୁ ପ୍ରାର୍ଥନା କରିବା

ନ ନେବାକୁ ଆମ୍ଭ ପ୍ରାଣ,

ନ ଶୁଣିଲେ ବାଣୀ,ହୋଇ ଏକମେଳି

ଭାଙ୍ଗିଦେବା ତାଙ୍କ ଟାଣ-

କିସ,କରିବ ମଥୁରା ରାଟ....

କେତେ କଲାଣି ତ ମନ୍ଦ ବାଟ ଗୋ

କିସ,କରିବ ମଥୁରା ରାଟ ।।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।