ଧରିନିଅ ଏବେ ହାତ
ଧରିନିଅ ଏବେ ହାତ
ତୁମରି ଗଳାରେ ବରମାଳା ଦେଇ
ବରିଲି ହୃଦୟେଶ୍ବର ,
ଏ ବଦନ ଦେଖି ସ୍ମରଣ ଆସିଲା
ସାଥୀ ସାତ ଜନମର ।
ତୁମ ନୟନର ବାଙ୍କଚାହାଣିଟି
ମୋହିନେଲା ମୋର ମନ ,
ରଙ୍ଗା ଅଧରର ଦରହାସ ଦେଖି
ବଶ ହେଲି ଭଗବାନ ।
ଜଗନ୍ନାଥ ନାମ ବହି ଜଗତର
ଦୁଃଖ କରୁଅଛ ନାଶ ,
ଇଚ୍ଛା କଲି ତେଣୁ-ତୁମ୍ଭରି ଗୃହରେ
ସଦା କରିବାକୁ ବାସ ।
ମଣିମା,ମଣିମା ତୁମ୍ଭଙ୍କୁ ଡାକିଲେ
ଶୁଣିବ ଜଗତ କଥା ,
ଜଗତବାସୀଙ୍କୁ ବାଣ୍ଟିବି ମୁଁ ପଡ଼ି
ଅନୁମତି ଦେଲେ ଧାତା ।
ମୁଁ ସାଗର କନ୍ୟା ହୋଇଯିବି ଧନ୍ୟା
ତୁମରି ସାନିଧ୍ୟ ପାଇ ,
ପାଳନ କରିବି ତବାଦେଶ ଯାହା
ବଡ଼ଦେଉଳରେ ଥାଇ ।
ତୁମରି ଚରଣେ ତନୁ ମନ ମୋର
ସବୁ ଅରପିଲି ନାଥ ,
ଏ ବରମାଳାକୁ ଗଳାରେ ଲମ୍ବାଇ
ଧରିନିଅ ଏବେ ହାତ ।