କହିଥିଲା କଥା
କହିଥିଲା କଥା
କବିସୌରଭ ଅନୁପ ସିଂହ ଦେବ
ରାଜା ଖଡ଼ିଆଳ
କହିଥିଲା କଥାମାନ ଦିନେ ମୁଁ ନ ମାନିଲିରେ
ତୋ ମନେ ଅଶାନ୍ତି ଦେଇ, କି ଯଶ ଅରଜିଲିରେ ।୦।
ବିବେକ ହରାଇ ଥିଲି ତେଣୁ ମନେ କଷ୍ଟଦେଲି
ପାପ କଳସୀରେ ପାଣି ଆହୁରି ମୁଁ ଢାଳିଲିରେ ।୧।
ଦେଖିଲି ତୋ ଶୀର୍ଣ୍ଣ ଦଶା ନ ପାରେ ପ୍ରକାଶି ଭାଷା
ଶୋକାନଳେ ଦେଇ ଝାସ ହୃଦୟ ମୋ ଦହିଲିରେ ।୨।
ତୋ ସୁଖ ସଂସାର ପୋଡ଼ି ଆଉ କି ପାରିବି ଯୋଡ଼ି
ଦାରୁଣ ବେଦନା-ଶରେ ତନୁକୁ ମୋ ଜାଳିଲିରେ ।୩।
ଅରଜିଲି ଅପଖ୍ୟାତି ବରଜିଲି କୁଳରୀତି
ଲାଜେ ମୁଖ ପୋତି ସଦା ଚିନ୍ତାରେ ମୁଁ ରହିଲିରେ ।୪।
ଚୋରା ପ୍ରୀତି-ଧାରେ ଯାଇ ଦେଲି ନିଜକୁ ଭସାଇ
ଉଦ୍ଧରିବାକୁ ପ୍ରଭୁଙ୍କୁ ଆରତରେ ଡାକିଲିରେ ।୫।
ସମାପ୍ତ