ଫୁଲବାମା
ଫୁଲବାମା
ଡଃ ଶଶୀ ଭୂଷଣ ମହାପାତ୍ର
ଦେଶ ସ୍ତବ୍ଧ
ଫୁଲବାମରେ ଆତଙ୍କର ଶବ୍ଦ
ଯବାନ ସହିଦ
ଜନତା ନିଃଶବ୍ଦ
ଆତ୍ମଘାତୀ ବିସ୍ଫୋରଣରେ
ଭାଙ୍ଗିଯାଇଛି ସୁନାର ସ୍ବପ୍ନ
ହୃଦୟରେ ଆଜି ଭୂମିକମ୍ପ |
ଅକାଳରେ ଝରିଥିବା ଜୀବନ
ଫୁଲ ନୁହେଁ,ଥିଲେ ନିଆଁ ଝୁଲ
ଉଡିଗଲେ ଯେମିତି ନିଆଁ ଗୁଲ,
ଦେଶ ପାଇଁ ବଳିଦାନ ଦେଇ
ହସି ହସି ମୃତ୍ୟୁକୁ କଲେ ଆଲିଙ୍ଗନ |
ମୃତ୍ୟୁ ଏକ ପରିସଂଖ୍ୟନ ନୁହେଁ
ସବୁବେଳେ ଏକ ଆଉ ହଜାରର,
କେତେ ହୃଦୟ ବିଦାରକ
ପଚାର ମାତା, ପତ୍ନୀ,ପୁଅ ଝିଅଙ୍କୁ
ଆପଣାର ଯେଣୁ ସେମାନେ ତାଙ୍କର|
ନିଃଶବ୍ଦ ବ୍ୟଥାର ବେଦନା
ମର୍ମେ ମର୍ମେ ସଭିଏଁ ବୁଝୁଛୁ
ଜଣା ନାହିଁ କିଏ ଚିହ୍ନ କିଏ ଅଚିହ୍ନା
ମୃତ୍ୟୁ ଯେମିତି ହେଇଛି ନିଜର କାହାର|
ଜୀବନ କେବେ ଦେଇନାହିଁ
ତୁମକୁ ଯଥେଷ୍ଟ ସମ୍ମାନ,
ମୃତ୍ୟୁ କିନ୍ତୁ କରୁଛି ସଲାମ
ମରଣର ସତେ ଆଜି ଜୟଗାନ |
ମନବି ଆମର ଯାଇଛି ମରି
ଶୋକ ସଭା ତାର ପ୍ରମାଣ
ଶବ୍ଦ ସବୁ ବତୁରି ଗଲାଣି
ଜବାବ ଦେବାକୁ ଖୋଜୁଛୁ କମାଣ|
ରକ୍ତ,ମାଂସ ,ହାଡ ଦେଇ
ତୁମେତ ଚାଲିଗଲ ଦେଶ ପାଇଁ
ଖୋଜୁଛୁ ତୁମକୁ ବାରମ୍ବାର ,
ଶବ୍ଦସବୁକୁ ରଖିଛୁ ଗୁନ୍ଥି ଗୁନ୍ଥି
କରିବାକୁ ଫୁଲମାଳ ତୁମପାଇଁ ,
ଏବେ ଆମେ ସବୁ ପ୍ରସ୍ତୁତ ହେଲୁଣି
ଆତଙ୍କବାଦକୁ ଦେବା ପାଇଁ
କମାଣରେ ଗୁନ୍ଥା ଫୁଲମାଳ |
************************