ଅଥଚ
ଅଥଚ
ଫୁଲରେ ଭରା ଏ ସହର
ହେଲେ,ରଙ୍ଗ କାହିଁ ରତିଏ ତ ନାହିଁ !
ବାସ୍ନା ବି ଭାରି ମହରଗ !!
ଅସ୍ଥିର ପବନ ଏଠି ବହେ ଅବିରତ
ମଣିଷ ଦେହର ଗନ୍ଧରେ
ରୀତିମତ ଗାଧୋଇ ଗାଧୋଇ,
ଅଥଚ,
ମଣିଷ ପଣିଆର ବାସ୍ନା
ଜମାରୁ ତ ବାରି ହୁଏନାହିଁ !!
ଇଏ ପୁଣି କେମିତି ସଂଯୋଗ ??
ସକାଳର କଅଁଳ ଖରାରେ
ପୋଡିଯାଏ ଖଟିଖିଆ ପିଠି,
ଅଥଚ,ଗ୍ରୀଷ୍ମର ନିଦାଘ ମଧ୍ୟାହ୍ନେ
ଠକ ଠକ ଥରୁଥାଏ
ତାରକା ହୋଟେଲର କୋଠୀ !!
ଅଦ୍ଭୁତ ସହର ଇଏ !
ଶୀତ ଖୋଜେ
ଲଂଗଳା-ଫୁଙ୍ଗୁଳା ଦେହ
ଉଷୁମ ହେବାକୁ ନିଜେ।
ଅଥଚ,
କାନ୍ଥର ଆରପଟେ
କେତେ ଦେହ କେମିତି କେଜାଣି
ସେଇବେଳେ ଭିଜନ୍ତି ଝାଳରେ !!
କିଛିଲୋକ ଆଉଟୁ ପାଉଟୁ ହୁଅନ୍ତି
ଭିଜିବାକୁ ବର୍ଷଣ ମୁଖର ରାତିରେ,
ଆଉ ଥୋକେ ଏକାଠି କରନ୍ତି
ବେଲାକଂସା,ହାଣ୍ଡି-ବେକା ଆଦି
ଗଣିଗଣି ଛପରର କଣା
ଶୁଖିଲା ଚଟାଣ ଟିକେ ଦର୍କାର ଯେହେତୁ
ପାରିବାକୁ ସପ ଓ ଗାମୁଛା
ବର୍ଷା ଟିକେ ଥମିଗଲା ପରେ।।
ମାଳମାଳ ରାସ୍ତାରେ ଛନ୍ଦା ଏ ସହର
ଚାଲିବାକୁ ଆୟୁଷ ନିଅଣ୍ଟ,
ଅଥଚ,
ପାଦଚଲା ବାଟ ଗୋଟେ ନାହିଁ
ଯୋଗାଡି ଆଣିବା ପାଈଁ
ପିଠିଢ଼ଙ୍କା କପଡାରୁ ହାତେ
ଦାନା ମୁଠେ ଭରିବାକୁ ପେଟ !!
====©====
ବିନୟ ଭୂଷଣ ପାଣିଗ୍ରାହୀ(ମିଟୁ)
ହରସିଂହ ପୂର,ପୀରହାଟ ବଜାର
ଭଦ୍ରକ-୭୫୬୧୩୧
-----------------
ପ୍ଲଟ ନଂ-୩୪୨,ସେକ୍ଟର୍-୫
ନିଳାଦ୍ରୀ ବିହାର,ଭୂବନେଶ୍ୱର-୨୧
୯୯୩୭୫୪୮୪୩୧ ଓ ୯୩୪୩୮୬୭୦୧୨୦