ଅଙ୍ଗବସ୍ତ୍ର

ବାହାରେ ବର୍ଷା

ରାତି ଅଧ ଅନ୍ଧାରରେ

ବିଜୁଳି, ଘଡଘଡି I

…

ଭିତରେ ମୁଁ  - ଏକାକୀ I

…

ମୋ ପତ୍ନୀଙ୍କୁ ଏ ଅଦିନିଆ

ମଝି ଅକ୍ଟୋବରର ବର୍ଷା

ପୁଲକ ଜଗାଏନା

ଭରିଦିଏନା ଉତ୍ତେଜନା I

…

ତାଙ୍କ ନିତିଦିନିଆ ସଂସାରରେ

ଯୁଝି ଯୁଝି, ଝାଳ ଛଡା ଆଉସବୁ

ତାଙ୍କପାଇଁ ଅଲଣା ଅସରା

ମୁଁ ବି I

…

କେମିତି ହେବିନି ଯେ I

…

ମୁଁ ବରଷାର ରାତିଟେ ଯାଚିଲା ବେଳେ

ତାଙ୍କ ମନ ଲାଗିଥାଏ

ନୂଆ ହଳେ କର୍ଣ୍ଣ ଦୁକୁଳରେ

ମୁଁ ତାଙ୍କୁ ହୃଦୟ ଯାଚିଲା ବେଳେ

ସେ ଅନେଇଥାନ୍ତି ମୋତେ

ଅଙ୍ଗବସ୍ତ୍ର ପରି

ବଦଳେଇ ଦେବାପାଇଁ ଯେମିତି

ମୁହୂର୍ତ୍ତକେ !