ସମୟର ଶେଷ ପରିଣତି
ସମୟର ଶେଷ ପରିଣତି
କିଏ ଜାଣେ ,
ହୋଇପାରେ ଆଜି ଦିନ ଶେଷ ଦିନ
ହୋଇପାରେ ଆଜି ରାତି ଶେଷ ରାତି
କିଏ ଜାଣେ ,
ହୋଇପାରେ ଆକି କଥା ଶେଷ କଥା
ହୋଇପାରେ ଆଜି ହସ ଶେଷ ହସ ।।
ସକାଳର ସୂର୍ଯ୍ୟ ରାତିର ଜହ୍ନ
ହୋଇପାରେ ଅପହଂଚ ,ଅଦୃଶ୍ୟ ।
ହୋଇପାରେ ରଂଗହୀନ
ଦିଗନ୍ତର ସ୍ଵର୍ଣ୍ଣାଭ ଦୃଶ୍ୟ ।।
ଛଅ ଖଣ୍ଡ କାଠର ନିଆଁ
ହୋଇପାରେ ଝଲମଲ ,
ସମୟର ଶେଷ ଚିଠି
ହୁଏତ ହୋଇପାରେ ଅପାଠ୍ୟ ,
ଅବୋଧ,ଦୁର୍ବୋଧ ।।
ତେବେ.....କାହିଁକି ?
ଏ କୁଢ କୁଢ
ଛଳନା ଓ ମଧୁର ପ୍ରତାରଣାର
ଦିଗନ୍ତ ବିସ୍ତାରୀ ନଭଶ୍ଚୁମ୍ବି ରୂପ ?
ଗର୍ବ ଅହଙ୍କାରର ମଖମଲି ଅଟ୍ଟାଳିକା
ଅବିବେକୀ ଅମଣିଷପଣିଆର
ସ୍ପର୍ଦ୍ଧିତ ପ୍ରବେଶ ?
ବକ୍ର ଗତିପଥ
ସ୍ଵାର୍ଥପରତା ଓ ହୀନମନ୍ୟତାର
ଲେଲିହାନ ଶିଖା ପ୍ରଜ୍ଵଳିତ ?
ସମୟର ନିକଂଚନ ଅମଡା ବାଟରେ
ନିତି ନିତି ହତ୍ୟା
ସ୍ଵଚ୍ଛ ସ୍ଵାଭିମାନର ଓ ମାନବିକତାର ।
ଯାହା ପ୍ରାଣହୀନ ଲାଗେ
ହୃଦୟର ପ୍ରତିଟି ସ୍ପନ୍ଦନ
ନିଗିଡି ପଡେ ଦୁଇ ବିନ୍ଦୁ ଅଶ୍ରୁ
ବ୍ୟର୍ଥହୁଏ ସମୟର ଶେଷ ନିବେଦନ
ଆକୁଳ ମର୍ମସ୍ପର୍ଶୀ ଯନ୍ତ୍ରଣାର
ଶେଷ ହୀନ କରୁଣ ଚିତ୍କାର ।।।
ଅଧ୍ୟାପକ ଶରତ କୁମାର ଦାସ