ବେସୁରା ଗୀତି-୭୧୫
ବେସୁରା ଗୀତି-୭୧୫
1 min
6.9K
ଏତେ କଥା ବର୍ଷା ମନେ ଥିଲା ଯଦି
କାହିଁକି ଛୁଇଁଲୁ ଛାତି
ଆଷାଢ ମାସରେ ଭରି ଦେଲୁ କିଆଁ
ଦେହେ ବଇଶାଖୀ ତାତି ॥
ଭିଜାଇ ଦେଇଛୁ ସଭିଙ୍କର ଦେହ
ଶୀତଳ କରିଛୁ ଧରା
ରୋମାଞ୍ଚେ ଭରିଛୁ କେତେ କେତେ ପ୍ରାଣ
କା ଆଖି ଲୁହରେ ଭରା ॥
କଳ କଳ ଛଳ ଛଳ ନାଦ କରି
ନଈ ଗାଇଲାଣି ଗୀତ
ମହକି ଯାଉଛି କାହାର ଅଗଣା
କେ ହଜାଏ ମଧୁ ମାସ ॥
ବରଷା ଲୋ ଆଜି ତୋ ମେଘ ପଣତ
ଢାଙ୍କିଛି ଜହ୍ନର ଦେହ
ଲିଭାଇ ଦେଇଛୁ ଜୋଛନର ଧାର
ହୃଦୟେ ଭରିଛୁ କୋହ ॥
ସତେ କଣ ଆଜି ପଣ କରିଛୁ ତୁ
ଦେବୁନି ତୋ ପ୍ରୀତି ଛୁଆଁ ?
ପରଶରେ ତୋର ଲିଭାଇବୁ ନାହିଁ
ହୃଦୟ ତଳର ନିଆଁ ?