ସେ ବୋହୂ-ବୋହୂକା ଖେଳ
ସେ ବୋହୂ-ବୋହୂକା ଖେଳ
ସେ ଦିନର ସେଇ ଧୂଳିଖେଳ କଥା
ମନେ ପଡ଼ିଯାଏ ସତେ ,
ମୋଅରି କନିଆ ସାଜିବା ପାଇଁକି
ଅଳି କରୁଥିଲୁ କେତେ ।
ମିଛିମିଛିକା ଯେ ଭାତ,ତିଅଣ ଲୋ
ସେ ବୋହୂ-ବୋହୂକା ଖେଳ ,
ଆଜି ହୋଇଗଲା ସତସତିକା ଲୋ
ଆସିଗଲା ଯେବେ ବେଳ ।
ବାହା ବେଦୀରେ ତୁ କନିଆ ସାଜିଛୁ
ମୁଁ ବାଣ,ରୋଷଣି ନେଇ ,
ବରବେଶ ସାଜି ଯାଉଅଛି ପରା
ଦୁଲୁକି ଉଠୁଛି ସାଇ ।
ଶଙ୍ଖ ହୁଳହୁଳି ପଡ଼ୁଛି ଉଛୁଳି
ଦିଶିଲାଣି ତୋର ଘର ,
ବରଯାତ୍ରୀ ଯେତେ ଉଚ୍ଛନ୍ନ ହେଲେଣି
ଦେଖିବାକୁ ମୁହଁ ତୋର ।
ଆଜିଠାରୁ ହେବୁ ଜୀବନ ସଙ୍ଗିନୀ
ଧରିନେଲା ପରେ ହାତ ,
ତୋଳିବା ଗୋଟିଏ ନୂଆ ଘର ଆମେ
ମିଛ ନୁହେଁ, ସତ-ସତ ।।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ ।