ମରମ ହୋଇଲା ଦହି

ତୁମକଥା ଭାଳି ସାରା ରାତି ମୋର

ଉଜାଗରେ ଗଲା ପାହି ,

ତଥାପି ତୁମର ଭେଟ ମିଳିଲାନି

ମରମ ହୋଇଲା ଦହି ।

ପ୍ରତିଟି ମୁହୂର୍ତ୍ତ ଲାଗୁଥିଲା ମୋତେ

ଯେହ୍ନେ ଗୋଟେ ଗୋଟେ ଯୁଗ ,

ମନ ଖାଲି ଛଟପଟ ହେଉଥିଲା

ଲଭିବାକୁ ତୁମ ସଙ୍ଗ ।

ଅନ୍ତରରେ ତୁମ ମୋହନ ମୂରତି

ଉଠୁଥିଲା ଖାଲି ନାଚି ,

ହେଇ ଆସିଯିବ,ବାରବାର ଯେହ୍ନେ

କହୁଥିଲା କିଏ ଯାଚି ।

ପ୍ରତୀକ୍ଷାର ଅନ୍ତ ହେଲାନାହିଁ କିନ୍ତୁ

ସାରା ରାତି ଗଲା ସରି ,

ତୁମ ବିରହରେ-ବିରହିଣୀ ହୋଇ

ମରୁଛି ମୁଁ ଝୁରିଝୁରି ।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।