ଆମ ଚରିତ୍ର

ଉପରେ ଗୈରିକ ବସ୍ତ୍ର ଧାରି ଅଛୁ

ଅନ୍ତରେ ଅସନା ଘର

ମହାନ ଦେଖାଉ ଉଚ୍ଚାରଣେ ଆମେ

ଆଚରଣେ କଂସାସୁର ।।

ଏ ଘର ମାଉସୀ ସାଜିଛୁ କେବେ ରେ

ସେ ଘରେ ଆମେ ପିଉସୀ

ଗୃହ ବିଭୀଷଣ ଉପାଧି ପାଇଛୁ

ଲମ୍ବା ଲମ୍ବା କଥା ଭାଷି ।।

କାମ ପାଇଁ ନୁହଁ କଥା ଆମ ଟାଣ

ଦୁର୍ନୀତିର ଗନ୍ତାଘର

ଦିନରେ ବାବାଜୀ ରାତିରେ ମାତିଛୁ

ଖୋଲିକି କଳାବଜାର ।।

ବିଶ୍ୱାସଘାତର ସବୁ ସୀମା ଭେଦୀ

ସାଜି ଅଛୁ ଅଣ୍ଟି ଛୁରୀ

ଆତଂକବାଦର ବିସ୍ଫୋରଣ ଦେଖି

ହସୁଅଛୁ କିରି କିରି ।।

ସମବେଦନାକୁ ଉପରେ ଦେଖାଉ

ଭିତରେ କୁତ୍ସାର ରଟୁ

ନିଜ ସ୍ୱାର୍ଥ ପାଇଁ ବଳି ଦେବୁ ସବୁ

ଯାହାର ଫାଟୁଛି ଫାଟୁ ।।

ଦେବବ୍ରତ ଜେନା

ଭୋଗରାଇ, ବାଲେଶ୍ବର