ମଣିଷ ଭଳିଆ ମଣିଷଟେ ହେବ

ମଣିଷ ଭଳିଆ ମଣିଷଟେ ହେବ

 

ପର୍ଶୁରାମ ବିଶ୍ୱାଳ

 

ବୁଝେଇଦବୁ କି ମୋ ମାଆମାନଙ୍କୁ ଆରେ ମୋ କଳାଠାକୁର

ସ୍ନେହ ଆଦର ସେ ମମତା ଦେଇକି ବଢ଼ାଉ ତା’ର କୁମର

ମାଡ଼ଗାଳି, ଟାଣ କଥା ଭୁଲିଯାଉ

ନିରିଦୟ ବ୍ୟବହାର ।

 

ମାଡ଼ ଖାଇ ଯେବେ ଡରୁଆଟି ପିଲା, ତେବେ କାମ ଗଲା ସରି

ଛେଳିଖିଆ ଲଙ୍କା ଗଛ ସେ ଜାଣିବ, ପାରିବ ନାହିଁ ଉଧୁରି

ତା ଭିତର ଶକ୍ତି ଭିତରେ ରହିବ

କାମେ ଲାଗିବନି କା’ର ।

 

ନିର୍ଭୀକ ହୋଇଲେ ପିଲାଟିଏ ଜଗା ହେବ ନିଶ୍ଚେ ସତ୍ୟବାଦୀ

ଏଇ ଦୁଇ କଥା ଏକାଠି ହୋଇଲେ କେ’ ନଥିବେ ତା’ର ବାଦୀ

ମଣିଷ ଭଳିଆ ମଣିଷଟେ ହେବ

ଯାହା ଖୋଜୁଚି ସଂସାର ।

 

ମାଆ ସିନା ସହେ ତା’ର ତେଲଲୁଣ ସଂସାର ଗୋଟିର ବୋଝ

ଖଟିଖଟି ବୁଝିବାକୁ ବେଳ ନାହିଁ, କେବେ ସେ ସକାଳ-ସଞ୍ଜ

ଅଝଟ ହୋଇଲେ ଛୁଆକୁ ସେ ମାରେ

ହରାଇ ବୁଦ୍ଧି ବିଚାର ।

 

ଲୋଡ଼ା ସେ ଉତ୍ତମ ବିଚାର ସଂସ୍କାର ଆଜି ଆମ ପିଲା ପାଇଁ

ମୁକ୍ତ ଆକାଶର ପକ୍ଷୀଟିଏ ସିଏ, ନଧର ତା ଦୋଷ କେହି

ଏଇ କଥା ଗୋଟି ମାଆମାନଙ୍କୁ ତୁ

ବୁଝେଇଦେଏ ଠାକୁର ।

 

ଗ୍ରା.-ମିତ୍ରସେନପୁର, ପୋ.ଅ.-ଗମୁଁ

ଭା.-ଇନ୍ଦୁପୁର, ଜି.-ଯାଜପୁର, ପିନ୍-୭୫୪୨୧୪

ଫୋନ୍-୯୮୫୩୭୫୯୭୦୦

*****