ତୁମେ କହିଦେଲ ତାହା

ନିରେଖିଥିବି ମୁଁ ତୁମକୁ ଏମିତି

ପଲକ ପକାଇବିନି ,

ଏତେଦିନ ପରେ ପାଖରେ ପାଇଛି

କୁହ କିଛି ତୁନି ତୁନି ।

ସଜଫୁଟା ନୀଳକଇଁ ଭଳି ତୁମ

ଢଳ ଢଳ ଦୁଇ ଆଖି ,

ମନେ ପଡ଼ୁଅଛି ପହିଲି ଦେଖାରେ 

ମନ ରହିଗଲା ଲାଖି ।

ଲାଜୁଆ ଲାଜୁଆ ଚାହାଣି ସହିତ

କଥା କହୁଥିଲ ଥିରି ,

ଓଠ କୋଣେ ଲାଖିଥିବା ଧାରେ ହସ

ହୃଦୟକୁ ଦେଲା ଚିରି ।

ଆନମନା ହୋଇ ଆଙ୍ଗୁଠି ଧାରରେ

ଟାଣୁଥିଲ ତୁମେ ରେଖା ,

ଓଢ଼ଣୀକୁ ହାତେ ଗୁଡ଼ାଉ ଗୁଡ଼ାଉ

ଦେଇଥିଲ ଗୋଟେ ଲେଖା ।

ମୁଁ କାଳେ ଆସିକି ଘରେ କହିଦେବି-

ଝିଅ ମନଲାଖି ନୁହେଁ ,

ତୁମେ ଲେଖିଥିଲ ,ରାଜି ହେଲେ ମୁହିଁ

ସଂସାର ଗଢ଼ିବା ଦୁହେଁ ।

ମନା କରିବାକୁ ଉପାୟ ନ ଥିଲା

ମନ ଖୋଜୁଥିଲା ଯାହା ,

ମୁହଁଖୋଲି ମୁହିଁ କହିବା ଆଗରୁ 

ତୁମେ କହିଦେଲ ତାହା ।