ଶୂନ୍ୟତା

ଶବ୍ଦ ଅଛି,ସୁର ଅଛି

ହେଲେ ଶୂନ୍ୟ ଅଛି ହୃଦ ଅଗଣା

ଶୂନ୍ୟ ଅଗଣାରେ ଧସେଇ ପଶନ୍ତି

ନିତି ନୂଆ ନୂଆ ଭାବନା ।

ମନଟା ମୋ ଆଜି ନଈଟିଏ ହୋଇ

ଧାଉଁ ନାହିଁ ଆଗେ ଆଗେ

ଫୁଲେଇ ଫଗୁଣ ରଙ୍ଗ ଭରିଲାନି

ଏ ମନ ଅଗଣା ବାଗେ ।

ହୃଦୟରେ ଯେତେ କାମନା ବାସନା

ଫିଙ୍ଗି ଦେଇଛି ମୁଁ ନଦୀର ଗଭୀର ଜଳେ

ହୃଦୟରେ ମୋର ଗୋଟିଏ ସପନ

ଦିନେ ଯିବି ମୁଁ ଯମୁନା କୂଳେ ।

ରାଧା ମନ ନେଇ ଯିବିନାହିଁ ମୁଁ

ଯିବି ଯଶୋଦା ର ମନ ନେଇ

ହୃଦୟ ବାତ୍ସଲ୍ୟ ମନର ମମତା

ସବୁ ସାଇତିଛି ତୋ' ପାଇଁ ।

ଦେଖା ହେବ ଯେବେ ଯମୁନା ଘାଟରେ

ଆଲିଙ୍ଗନ ତୋତେ କରିବି

ଶୂନ୍ୟ ହୃଦୟ ମୋ ପୂର୍ଣ୍ଣ ହୋଇ ଯିବ

ତୋ ପରଶ ଯେବେ ପାଇବି ।

ପିପାସୁ ଓଠ ମୋ ଚୁମିବ ତୋ ମଥା

ବେଦନା କୁ ଭୁଲି ଯାଇ

ଶୂନ୍ୟ ହୃଦୟ ପୂର୍ଣ୍ଣ ମୋ ହେବ

ତୋ' ପରଶ ଟିକେ ପାଇ ।

ଗଡି ପଡୁଥିବ ଆନନ୍ଦ ର ଅଶୃ

ପରଶ ତୋହର ପାଇ

ତୁ'ପୋଛୁଥିବୁ ଲୁହକୁ ମୋହର

ମୁଁ ଚିର ନିଦ୍ରାରେ ଯିବି ଶୋଇ ।