କର୍ତ୍ତବ୍ୟ ଏ ମତଦାନ
କର୍ତ୍ତବ୍ୟ ଏ ମତଦାନ
ଗୁପ୍ତ ମତଦାନ ପ୍ରଜାତନ୍ତ୍ରେ ସ୍ଥାନ
ପାଇଛି ଶୀର୍ଷରେ ଯେଣୁ
ଦେଶେ ପୁରଗ୍ରାମେ ନାଗରିକ ଆମେ
ଭୋଟ ଦେଇପାରୁ ତେଣୁ ।
ବହୁମତ ଯିଏ ପାଇଥାଏ ସିଏ
ସଂସଦକୁ ଯିବା ପରେ
ଆମ ବଛା ପ୍ରାର୍ଥୀ ହୋଇ ଆମ ସାଥୀ
ସମସ୍ୟା ସ୍ଥାପନ କରେ ।
ଅଧିକ ଆସନ ପାଇଲେ ଶାସନ
କରିଥାନ୍ତି ଯେଉଁ ଦଳ
ବହୁମତ ଥାଇ ପାଞ୍ଚବର୍ଷ ପାଇଁ
ଚାଲେ ସରକାରୀ କଳ ।
ସଭାଗୃହ ତଳେ ବିରୋଧୀଙ୍କ ବଳେ
ଉଠେ ପ୍ରତିବାଦ ସ୍ବର
ବ୍ୟବସ୍ଥା ଏ ଯହିଁ ନଥାଏ ବି ତହିଁ
ମନମୁଖୀ ହେବା ଡର ।
ସଂସଦରେ ପୁଣି ଜନମତ ଶୁଣି
ଗଢା ହୋଇଥାଏ ନୀତି
ଅଧିକଙ୍କ ଆସ୍ଥା ନିରୂପଇ ରାସ୍ତା
ସେଲାଗି ନଥାଏ ଭୀତି ।
ହେବାନାହିଁ ସ୍ବାର୍ଥୀ ସର୍ବୋତ୍ତମ ପ୍ରାର୍ଥୀ
ବାଛି ନିରପେକ୍ଷ ଭାବେ
ଟାଳି ପ୍ରତିଘାତ ବଢାଇବା ହାତ
ସମୂହ ବିକାଶ ଲାଭେ ।
ଥିବା ନିର୍ବିକାର ଯେତେ ଅଧିକାର
ଦେଇଅଛି ସମ୍ବିଧାନ
ଗଣତନ୍ତ୍ରେ ମିତ୍ର ପରମ ପବିତ୍ର
କର୍ତ୍ତବ୍ୟ ଏ ମତଦାନ ।