ଆମ୍ଭେ ତୁମ୍ଭ କୃପାପାତ୍ର

ଆମରି ଦୁଃଖରେ ଦୁଃଖୀ ହୋଇ ସିନା 

ହୋଇଥାଅ ତୁମେ ସାହା ,

ତୁମ ଦୁଃଖବେଳେ ସାନ୍ତ୍ୱନା କେ ଦିଏ 

ପାଶେ ଆସି ଆହେ ନାହା !!

ଦୁନିଆ ଯାକର ଦୁଃଖ ସୁଖ ବୁଝି

ହୋଇ ଯାଅନା କି କ୍ଳାନ୍ତ ,

ସମସ୍ୟା ଘେରରେ ଥାଇକରି କେହ୍ନେ

ରହିଥାଅ ସଦା ଶାନ୍ତ !!

ମନୋହର ତୁମ ଚେହେରା ସାଙ୍ଗକୁ

ଓଠ ଧାରେ ମିଠା ହସ ,

ସେଇ ହସରୁ ତ କଣେ କଣେ ଦେଇ

ଦୁଃଖୀ ଜନ ଦୁଃଖ ନାଶ ।

ଗୁଣାତୀତ ତୁମେ ନିର୍ଗୁଣ ପୁରୁଷ

ସଗୁଣ ସାକାର ପୁଣି ,

ଯୋଗୀ,ମୁନି,ଋଷି ,ଦେବତା,ଦେବର୍ଷି

ପାରନ୍ତି ନାହିଁ ଯା' ଜାଣି ।

ଯେତେ ଲୀଳା ଖେଳା ତୁମ୍ଭଙ୍କୁ ଗୋଚର

ଆମେ ତ ନିମିତ୍ତ ମାତ୍ର ,

ସର୍ବବ୍ୟାପୀ ତୁମେ ଅନ୍ତର୍ଯ୍ୟାମୀ ନାଥ

ଆମ୍ଭେ ତୁମ୍ଭ କୃପା ପାତ୍ର ।

ସ୍ଥିତପ୍ରଜ୍ଞ ଆଉ ସମଦର୍ଶୀ ବୋଲି

ସଂସାରରେ ଅଛି ଖ୍ୟାତି ,

ସେଇ ସୁଗୁଣରୁ କିଛି କିଛି ଦେଲେ

ଦିବ୍ୟାନନ୍ଦେ ଯିବୁ ମାତି ।