माझा बळीराजा

*बळी राजा

माझा सोन्याचा संसार

जरी पोट शेतीवर

घाम गाळतो अंगाचा

रोज काळ्या मातीवर|१|

करी शेतीची राखण

झाडे मोठी बांधावर

असे काटेरी बाभूळ

उभी राही काठावर|२|

नांगरणी कुळवणी

कामे किती मेहनती

सर्जा राजा सोबतीला

दिनरात काम करी|३|

हळूहळू वाफ्यातुन

मोटारीचे पाणी जाई

ध्यान ठेवी शेतकरी

जशी तान्हुल्याची आई|४|

धान्य पिके भरपूर

प्रेम आहे शेतावर

जशी लाडाची बायको

जीव लावी माझ्यावर|५|

माझं सपान फेडती

माझे हिरवे शिवार

डोळा भरून येईल

सुखी होईल संसार|६|

बैले जुंपतो गाडीला

जातो घरच्या वाटेला

झोप लागे गाडीतच

वाटे आराम जीवाला|७|

मुकी बैल जोडी माझी

माझ्या साथ जीवनाची

वाटे मनाला माझ्याही

आज आस जगण्याची।८।