गजानना
गजानना
कर्ता करविता, तू सुखदाता, गौरीच्या नंदना
रिद्धी सिद्धीच्या दाता दयाळा विनायका गजानना ।।धृ।।
मंगलमय तव रूप गणेशा, डोळा सुख देते
तुझ्या दर्शनाने आनंदाला किती उधाण येते
भावभक्तीने भजता होते पूर्ण मनोकामना ।।१।।
गणनायक तो कसा असावा सकलांना दावशी
तुझ्या रूपातून साऱ्या जगाला मार्गदर्शन करशी
एक एक अवयव दावितो नवीन अर्थ जना ।।२।।
भले बुरे जे कानी येते, योग्य तेच ऐकावे
निवडून घ्याया सुपासारखे कान असू द्यावे
म्हणून शोभते नाव शूर्पकर्ण तुजला गजवदना ।।३।।
उदरी लपवशी चुका गणांच्या नसे कधी गणती
विनायका, तुज म्हणून सारे लंबोदर म्हणती
बुद्धीची देवता, सुखदाता पावशी भक्तजना ।।४।।
अर्ध दात सांगतो, चालते बुद्धी कमी जराशी
दात पूर्ण सांगतो असावी श्रद्धा पूर्ण मनाशी
भावपूर्ण हृदयाने घडावी गणेशाची प्रार्थना ।।५।।