कविता म्हणजे काय ?

कविता म्हणजे काय असते ?

मनातल्या शब्दांचे गुंफण

हृदयी कायमच्या कोरलेल्या

भावनांचे नाजूक कोंदण..... [१]

कधी शांत, संयमित, मृदू

कधी कविता असते निखारा

ज्वलंत, धगधगणारा, अंगार

विद्रोही कवितेमुळे येतो शहारा..... [२]

सुगंधासाठी काही मिसळले शब्द

तरलतेने ओवला शब्दांचा हार

आनंदी असेल कवी जर का,

कविता असते सुखाची धार..... [३]

मनातली भावना उतरते कागदावर

तेव्हाच तर कविता बनत जाते

आपल्या आयुष्यातील क्षणांचा

ती मग अलगदतेने मागोवा घेते..... [४]

जीवनात जेव्हा प्रेम असते

तेव्हा नाजूक प्रेमाचे चित्रण

चिंध्या झाल्यावर मनाच्या मात्र

ओरबाडलेल्या हृदयाचे कात्रण..... [५]

भिडावी रसिकापर्यंत कविता

मग कवितेने घालावा दंगा

नित्य झरावी लेखणीतून

ही कवितेची अविरत गंगा..... [६]