उत्तर
उत्तर
एकविसाव्या शतकातही
जन्मानं आमच्या उरात तुमच्या
धडकी का भरावी हो ?
उत्तर मला हवे हो !
समतेच्या गप्पा बाहेर मारता
घरात मात्र बायकोला मारता
तुम्हीच सांगा असे का करता ?
उत्तर मला हवे हो !
मुलीला म्हणता परक्याचं धन
जाणत नाही त्यांचं मन
असे का करता सारे जण ?
उत्तर मला हवे हो !
मुलासाठी तुम्ही नवस करता
उमलण्या आधीच कळीला खुडता
तुम्हीच सांगा असे का करता ?
उत्तर मला हवे हो !
घराण्याला वारस हवा म्हणता
गाऱ्हाणं त्यासाठी देवाजवळ मांडता
विज्ञान जाणूनी असे का करता ?
उत्तर मला हवे हो !
वंशाला दिवा हवा म्हणता
मुलासाठी नादी भोंदूंच्या लागता
पणतीकडे सदा दुर्लक्ष का करता ?
उत्तर मला हवे हो !
बायको सुंदर सोज्वळ पाहता
आई ही वत्सल हवी म्हणता
जपतांना ही नाती आम्हा का नाकारता ?
उत्तर मला हवे हो !