उध्वस्त
उध्वस्त
स्वप्न हिरवे पाहिले
होते पिकही खुशीत
उन वाऱ्या संगे
होते आनंदाने गात
केला घात एकाएकी
रात्रीतून असा सारा
खिन्न उदास मातीत
वाहे निवांत हा वारा
कशी घालावी समज
माझ्या मनाचीच आता
झाले उध्वस्त सारेच
अवकाळी सर येता
गेले वाहून शिवार
स्वप्न सारेच उध्वस्त
घास हिरावून देवा
केले मरण तू स्वस्त
बघतोच मी ही आता
कोण किती झुंझवतो
भेगाळल्या स्वप्नातही
नवी उमेद पेरतो
नाही मानणार हार
स्वप्न पेरेल नव्याने
आशावादी पुत्र तुझा
पुन्हा लढेल जोमाने