मन पावसाळी
मन पावसाळी
मन पावसाळी माझं, कसं ओलं चिंब झालं|
मन मोराचा पिसारा, अंग शहारून आलं||
मन रानात वनात, रुंजी घाली पावसात|
मन प्रीतीच्या फुलात, मन न्हाल पावसात||
शालू नेसून हिरवा, आता नवं बीज अंकुरलं।
धरणी माय मनातुनी, गोड गालात हासलं।।
कसं सांगू मी कुणाला, माझ्या मनाच गुपित|
जसं वाऱ्या-पावसात, पाणी येत गं ढगात||
झाड, वेलींच्या फुलांनी, वनराई गं फुललं|
धरती प्रीतीच्या प्रेमात, अशी न्हावून निघलं||
धनी माझा दूर देशी कसा निरोप धाडावा|
वाऱ्या-पावसात कोण असा, मैतर मिळावा||
आलं आभाळ भरून नभ, काळ निळं झालं।
कस धन्याला कळलं, मन पावसाळी झालं।।