रणरागिणी
रणरागिणी
जयंती जय हे अंतरगामी
तूच दुर्गा तूच रणरागिणी
सुखदुख झेलूनी संसारात
निर्मियली गजगामीणी..
तुझ्यात गार्गी, मैत्रेयी
दिव्यमणी वंशवाहिनी
तू संवेदनशील जननी
तूच आई,भार्या भगिनी..
तूच अस्त्र तूच शस्त्र
लढण्या तत्पर ममतेसाठी
अंगअंगात सामर्थ्य जागवी
होवून काली महिषासूरमर्दिनी..
थकले ब्रम्ह चैतन्य जेथे
अवतरली जगी आई बाई
खेळ जगाचा या स्त्रीशक्तीवर
तूच धरेवरची जगजननी...
झांशीची राणी कडेवर लेकरू
गोऱ्यांशी कशी झुंज करारी
चितोडची पद्मिनी,इंदिराबाई
जीवंत प्रतिभा दाखविली दिलेरी..