सय माहेराची
सय माहेराची
सय माहेराची येता
येतं हृदय भरून
काळ्या डोंगराच्या आड
दिसे माहेर दुरून ।।
सय माहेराची येता
मला लागते उचकी
आठवण बंधुराया
भर झोपेत दचकी ।।
बाई मह्या सपनात
सण पंचमीचा येतो
शेता चालता वाटेला
भास मुऱ्हाळ्याचा होतो ।।
कसं साजत माहेर
घरा दाराला झुंबरं
चिरबंदी राजवाडा
त्याला मोत्याची झालरं।।
सय माहेराची येता
नाही मन गं लागतं
माझ्या माहेरा सारखं
नाही सासरं वागतं ।।
सय लाडकीची येता
गोठ्या हंबरते गाय
ओढ लेकीच्या येण्याची
भान हरवते माय ।।