श्री स्वामी समर्थ

देवतांचा देव । श्री स्वामी समर्थ ।

कार्य होई सार्थ । कृपेमुळे ॥१॥

मनी आहे भाव । रोजची स्मरतो ।

तुलाच पूजतो । देवराया ॥२॥

सर्वांचा तू देवा । ब्रह्मांड नायक ।

जगाचा मालक । स्वामी माझा ॥३॥

श्री स्वामी समर्थ । आमची माऊली ।

कृपेची सावली । अखंडीत ॥४॥

आम्हांवरी देवा । धर छत्रछाया ।

करावीस माया । सदोदीत ॥५॥

अस्तित्व तुझे । पाषाणी नि जळी ।

काष्ठी आणि स्थळी । तिन्ही लोकी ॥६॥

पाठीशी राहावा । अनाथांचा नाथ ।

नित्य लाभो साथ । या भक्तांना ॥७॥

तुझ्याच कृपेने । मोहोरली सृष्टी ।

ठेवलीस दृष्टी । जगावरी ॥८॥

नाम, जप, यज्ञ । नित्य तुझा करू ।

नेहमीच स्मरू । शिकवण ॥९॥

भिती नाही कधी । तुला रे वाटली ।

करूणा दाटली । सर्वांसाठी ॥१०॥

'उमा' मागे आज । तुझे वरदान ।

विवेकाचे ज्ञान । तू द्यावेस ॥११॥