संभ्रम
संभ्रम
हल्ली मरणं जितकं सोपं
जगणं तितकंच कठीण झालं
नेमका दोष कशाला द्यावा
कळणं मात्र कठीण झालंय ।
आयुष्याचे खाच-खळगे भरता
मनुष्य जन्माचे सार्थक करता
आयुष्य आता वाळवंट झालंय
नेमका दोष कशाला द्यावा
कळणं मात्र कठीण झालंय ।
जन्मासोबतच चिकटते जात
अमानवी रुढींमुळे होतो घात
जात्यांध विषंच पसरत आलंय
नेमका दोष कशाला द्यावा
कळणं मात्र कठीण झालंय ।
मूठभर स्वप्नं घेऊन उराशी
मन झेपावे उंच उंच आकाशी
स्वप्नांनांच बाजारी विकलं जातंय
नेमका दोष कशाला द्यावा
कळणं मात्र कठीण झालंय ।
कुठेही आज वशीलेबाजीला वाव
गुणवत्तेपेक्षा असे पैशालाच भाव
ध्येयासाठी झटणं दुर्मिळ झालंय
नेमका दोष कशाला द्यावा
कळणं मात्र कठीण झालंय ।
श्रेष्ठ कनिष्ठभेद आजही समाजात
समतेची भावना चेतवावी उरात
अरेरे!माणुसकीचा किती हा विलय
नेमका दोष कशाला द्यावा
कळणं मात्र कठीण झालंय ।