परतफेड

होय

भरभरुन देतोयस तू

अगदी निरपेक्ष भावनेने

मुक्तहस्ते

ओंजळ माझी भरतोयस तू.

मंजुळ कलरव पक्ष्यांचा,

ओढ्याची खळखळ,

मोराचा केका

पानांची सळसळ

दऱ्यांतून घुमनारा प्रतिध्वनी

अन् वाऱ्याचा ठेका.

कर्णमधुर निसर्गसंगीत

मनमोहक ,प्रसन्न,आल्हाददायक

लोभसवाणे इंद्रधनु रंगीत.

कुठेच न मिळणारा

अमूल्य असा प्राणवायू

तूच पुरवितो

तोही अगदी मोफत.

फळे ,फुले,पर्जन्य,औषधी,लाकूड,छाया

देऊनि करतोस

मजवरी अमाप माया.

वृक्षा,

अनंत उपकार आहेत

तुझे मजवरी

मदत तुझी नानापरी.

अन् मी.........

मी कशी करू तुझी परतफेड?

अशक्यच आहे ते.

पण मी होणार व्यक्त

करणार दोन हातांनी मदत.

तुझ्यासाठी येईन मी धावत.

लाविन रोपटी

राखीन निगा

मिळेल जिथे- जिथे जागा

करीन बचत पाण्याची

योग्य विल्हेवाट कचऱ्याची

सागरसम्पत्ति, जीवसृष्टी

हिरवीगार वनराई

जपेन प्राणपणाने

तरीही होणार ना उतराई.