एक कविता तुझ्यासाठी

एक कविता तुझ्यासाठी

देशप्रेमाने भारावलेली तुझी छाती

शत्रूसामना करण्यासाठी शस्त्र हाती

सीमेवर राहून जपतो नि जगतोस नाती

हे शूर सैनिका एक कविता तुझ्यासाठी

गर्भात वाढवतेस पोटचा गोळा नऊ मास

देशसेवेचा संस्कार करतेस मुलावर खास

काळजापासून दूर ठेवतेस तुझा जणू श्वास

हे जवानांच्या माते एक कविता तुझ्यासाठी 

अनेक स्वप्ने पित्याने जपली जरी उराशी

नाळ जोडली पुत्राची देशाच्या सेवेशी

अशी दिव्य त्याग मुर्ती तू जगी असशी

हे जवानांच्या पित्या एक कविता तुझ्यासाठी

कुंकू आपल्या भाळावरचे सौभाग्यलेणे

देशसेवेत पतीची साथ ठावे तुला देणे

विरहाचेही आवडीने तू गातेस कसे गाणे

हे जवानाची पत्नी एक कविता तुझ्यासाठी