सुंदर माझा संसार

सुंदर माझा संसार , छोटं घर दार

सुखी माझा परिवार , गोविंद गोविंद ।।

सासू आणि सासरा , देर हा तिसरा

कुटूंबाला आसरा , गोविंद गोविंद ।।

रामाच्या पहारी , कोंबडा देई बाग

बाई मला आली जाग , गोविंद गोविंद ।।

अंधारल्या रातीला , तांबडं फुटलं

बाई वसूदेव भेटलं , गोविंद गोविंद ।।

दळण काढीते सुपात , वर्ण घाली जात्यात

पीठा येई बरकत , गोविंद गोविंद ।।

घर घर आवाजात , जातं माझं घुमतं

ओव्या गाऊ कौतूकात , गोविंद गोविंद ।।

सासू माझी अडाणी , गाते गोड गाणी

तुळशीला घाली पाणी , गोविंद गोविंद ।।

सासू आणि ननंद , घरा मध्ये आनंद

भजनात होई दंग , गोविंद गोविंद ।।

घर माझं मंदिर , दिसे बहू सुंदर

नित्य वारी पंढरपूर , गोविंद गोविंद ।।

उठा गं सयांनो , करा सडा रांगोळी

ओवी गात सकाळी , गोविंद गोविंद ।।