उठबशी

सांग ना आई बोल ना

का अबोला माझ्याशी

काय झाला माझा गुन्हा

का काढू मी उठबशी?।।धृ।।

तुझा बाळ मी लाडका

मुळीच नाही चिडका

नाही माहीत मजला

कशी फुटली गं बशी?।।1।।

निजलेल्या तानुलीला

त्रास नको ना व्हायला

मारून एक चापटी

उडविली गं माशी।।2।।

भातुकलीचा खेळ तो

मी कधीच ना खेळतो

मी ना घेतली बाहुली

उगा रडते गं काशी।।3।।

आत्याबाईंची वेणी ती

आहे खरी का खोटी ती

कुतूहल वाटते मला

ओढून पाहिली जराशी।।4।।

शुभ्र लांब मिशीवर

आजोबा देती ना भर

खुशीत येऊन मीही

पिळली तिला काहीशी।।5।।