तू नसतांना

उदास भासे जगात सारे तू नसतांना ।

भकास झाले घरात सारे तू नसतांना ।।

तुला स्मरावे बागेमधले फूल पहाता ।

फुलास येती सुवास न्यारे तू नसतांना ।।

मनास वाटे पाऊस ल्यावा मस्त फिरावे ।

नकोच वाटे पाऊस वारे तू नसतांना ।।

तनूस माझ्या प्रसन्नता ये तुझिया स्पर्शे ।

असे आज का भरे कापरे तू नसतांना ।।

क्षणक्षणाने फुलून जावे तू असतांना ।

युगापरी हा क्षणेक भासे तू नसतांना ।।

कुणास सांगू मनी दाटल्या भावभावना ।

कुठे करावे मना मोकळे तू नसतांना ।।

जगात झाली बरीच गर्दी त्यात नसे तू ।

कुणास आता "माय" म्हणावे तू नसतांना ।।