भेट तुझी माझी
भेट तुझी माझी
1 min
1.3K
मृत्यूला या कवटाळून गेली भेट तुझी माझी
जगण्याला या भाळून गेली भेट तुझी माझी
बाग बहरे जीवनाची उमलली प्रितफुले
हृदयावरती माळून गेली भेट तुझी माझी
शमती वादळ उठुनी तरंग उठती मनी
भाव मनीचे चाळून गेली भेट तुझी माझी
अर्थ दिधला जन्माला श्वास तूच माझा
हे आनंदाश्रू ढाळून गेली भेट तुझी माझी
साथ सोडली रक्ताने अन परके झाले सारे
वाट वैऱ्याची टाळून गेली भेट तुझी माझी
बघ अबोल आसवे कशी दाटती नयनी
सल बोचरी गाळून गेली भेट तुझी माझी
मनी लपवला सूर्य हाती घेऊन चंद्रमा
द्वेष असूया जाळून गेली भेट तुझी माझी
नको नको त्या शंका सदा उठवती अफवा
व्रत मौनाचे पाळून गेली भेट तुझी माझी