बाप पिता

बाप महा वाट पाहे

पाहे लेकरु येण्याची

सण येतो बैल पोळा

पोळा आवड बाळाची ||१||

बाप रानामधी जाय

जाय सर्जा राजा संगे

पोळा म्हणे आज बाप

बाप रंगवीतो शिंगे ||२||

धुतो बैल तलावात

तलावात खोल पाणी

गळा बांधे घाटीमाळ

घाटीमाळ धून कानी ||३||

बाप शेतावर राबे

राबे माय संगतीला

तिचे भेगाळले पाय

पाय चालते पाथीला ||४||

बाप तिफणीच्या मागे

मागे चाले बंधू माझा

येता पावसाच्या सरी

सरी येता खुश राजा ||५||

काळ्या माती बाप पेरे

पेरे काळजाचे धनं

धनं येई तरारुन

तरारुन जाई मनं ||६||

बाप पाहे वाट त्याची

त्याच्या जमिनीला भेगा

जाई शेताकडे बाप

बाप रात्र रात्र जागा ||७||