स्पर्श पावसाचा

अवनीस पावसाचा

स्पर्श पहिलावहिला

आनंदाला उधाणच

अणुरेणू गंधाळला... १

महागडी हो अत्तरे

तयापुढे गंधहीन

अनामिक प्रेमबंध

भासे जग सारे दीन... २

मेघ तेच, तेच पाणी

वेगळाले तरी स्पर्श

निरागस रुपातून

लेकरांचा होई हर्ष... ३

कधी होई प्रेमसाक्षी

प्रणयास फुलवितो

श्वासाधार बळीचा जो

विरहिण तो जाळतो... ४

रुसलेला की कोपला?

त्याची द्विधा कळेचना

खोटा पसारा जगाचा

त्यास हुरुप येईना... ५

कोरडाच हा पाऊस

जाणवेना हो ती ओल

संवेदना काळजाची

हाय रुक्ष आणि खोल...६

चक्षू चातकी जनांचे

शिणलेले, आसावले.

तमी वाट भविष्याची 

अवजड ओझे झाले... ७

राजा सृष्टीचा पालक

पोसतोया सालभरी

गळे तरुंचे चिरतो

तरी आम्ही अविचारी ...८