संसार हा सुखाचा
संसार हा सुखाचा
हा खेळ नशिबाचा, हा ऊन पावसाचा ।
कधी भासतो दुःखाचा, संसार हा सुखाचा ।।
हळदीचे अंग माझे, हिरवा चुडा मी ल्याले ।
करण्यास मी निघाले, संसार हा सुखाचा ।।
स्वप्ने तऱ्हेतऱ्हेची, घेऊन ऊरी आले ।
साकारण्या निघाले, संसार हा सुखाचा ।।
कैसे ते स्वप्न विरले, झोपी नशीब गेले ।
थळाथळात चाले, संसार हा सुखाचा ।।
रक्ताळले ते पाय, मेंदीचे हात चिरले ।
जोरात तरी चाले, संसार हा सुखाचा ।।
अंथरूण चिपाटांचे, ढेकूळ ते उशाला ।
आकाश पांघराया संसार हा सुखाचा ।।
भांडीकुंडी नको ती, ना वस्र आभूषणे ही ।
चिंता उगी कशाला? संसार हा सुखाचा ।।
राहणे न याच ठायी, जाणे दुज्या ठिकाणी ।
घरकूल ते कशाला? संसार हा सुखाचा ।।
पतीप्रेम सोबतीला हवे काय मग जीवाला ।
करिते मी " पंडिता"चा संसार हा सुखाचा ।।