थंडगार खिडकीच्या आडोशात
थंडगार खिडकीच्या आडोशात
तुझ्याजागी तू आहेस
माझ्याजागी मी
मृगपावसाची सुरवात झालीय
मग भिजायचं कुणी ?
वाफाळलेला चहाचा कप
थंडगार खिडकीच्या आडोशात
मी प्रत्येक घोटात...विचारमूर्ती
तू अजूनही तापलेल्या ग्रीष्मात
पाठवू का आसवं आकाशाची
तुझ्यासाठी ...
ओंजळीच्या भरात
माझ्या कपातलं वादळ
अजुनही उसळतयं
थंडगार खिडकीच्या आडोशात
तुझ्याजागी तू आहेस
माझ्याजागी मी
प्रवाह वाहुन गेलाय अंगणातला
होडी बनवायची कुणी ?
माझ्या श्वासाची प्रत्येक लय
बेसूर होते ..
वीज गेलेल्या अंधारात
गाणं ही गुणगुणताना चुकतयं
मनाची पानं भलत्याच विचारात
काढु का चिञ रंगीत इंद्रधनुचे?
तुझ्यासारखेच हरवेल ते
पावसानंतरच्या हिरव्या विरहात
तुझ्याजागी तू आहेस
माझ्याजागी मी
पाऊस तर बरसणार
दरवर्षीच्याच श्रावणात
उत्कट व्यथा ओलीचिंब होते
भिजते शहारते
वाफाळलेला चहाचा कप
पुन्हा घेते
थंडगार खिडकीच्या आडोशात
तुझ्याजागी तू आहेस .......
माझ्याजागी मी .........!