साद वटवृक्षाची

वळणावर झाड

उभे वडाचे एक

लोटलीत कैक

वर्षे

वटवृक्ष वयोवृद्ध

विस्तार जयाचा खुप

विलोभनिय रूप

डेरेदार

वरदान वसुंधरेचे

गर्द हिरवी काया

देतसे छाया

वाटसरुंस

घरकुल पाखरांचे

लपवितो कसे फांद्यांवरी

शोभतो पहारेकरी

वनदेवीचा

वड देतो

मेवा फळांचा गोड

नसे तोड

त्याला

वटवृक्ष तोच

उभा आज विषण्ण

मनःस्थिति खिन्न

बहु

वृक्ष निस्तेज

शाखा नि पर्णविरहित

नव्हते हरित

केविलवाणे

दुष्ट मानवाची

सांगू लागला कथा

मांडितो मनोव्यथा

व्याकुळ

गाळुनी पाने

घालितो मनुजास 'साद'

सोडावास नाद

वृक्षतोडीचा

सुसह्य जीवना

कर तू वृक्षारोपण

संगोपन ,संवर्धन

सर्वकाळ

हसेल निसर्ग

वाहतील आनंदाचे वारे

होतील सारे

सुखी.