साठवावे नेत्री
साठवावे नेत्री
फुलली फुलली । पंढरीची वाट ।
वाळवंटी थाट । वैष्णवांचा ।।
पुन्हा पुन्हा वाटे । धरावे ते पाय ।
एकची उपाय । तरण्याचा ।।
विठूमाऊलीचे । पाहताच मुख ।
त्रैलोक्याचे सुख । मिळते गा ।।
निघोनिया जाई । शीणभाग सारा ।
घाली प्रेमधारा । स्नेह स्नान ।।
तूच रे विठ्ठला । विश्वाचा या राजा ।
सांभाळीतो प्रजा । आनंदाने ।।
मायही विठ्ठल । विठ्ठलची बाप ।
सरे भवताप । चरणाशी ।।
सांगतो मुरारी । साठवितो नेत्री ।
पाहिले जे क्षेत्री । पंढरीत ।।