सर पावसाची
सर पावसाची
सर पावसाची सर पावसाची !
अन् चाहुल...!
नव्याची नवलाईची, नव स्वप्नांची,
नव आशेची, नव संधीची, नव वाटेची,
नवारंभाची, नवांकुराची, नव जीवनाची
सर पावसाची सर पावसाची !
अन् चाहुल...!
उत्कर्षाची परिवर्तनाची,
सुगीची, सुखाची, संप्पन्नतेची,
हिरवाईची, धान्य राशीची, फळ फुलांची
सर पावसाची सर पावसाची !
अन् चाहुल...!
चिंब होण्याची, भटकंतीची,
वेडेपणाची, भुलण्याची
भरकटत्या दिवसांची, निथळत्या तिन्हीसांजेची
सर पावसाची सर पावसाची !
अन् चाहुल...!
कस्तुरी वाऱ्याची, दहकत्या गारव्याची
टपोऱ्या थेंबाची, कोसळत्या झऱ्याची
खळाळत्या नदीची, उसळत्या लाटांची
सर पावसाची सर पावसाची !
अन् चाहुल...!
थिरकत्या मोराची बागडत्या वासराची
थरथरत्या पक्षांची, भिरभिरत्या पाखरांची
गुंजरवाची, केकारवाची
सर पावसाची सर पावसाची !
अन् चाहुल...!
प्रणयाची, सृजनाची
बिलगत्या एकांती, गुलाबी श्वासांची
ओल्या चुंबनाची, सप्रेम लावण्याची
सर पावसाची सर पावसाची !
अन् चाहुल...!
हुरहुरत्या विरहाची, नकोशा एकटेपणाची
सलत्या आठवणींची, हिरव्या जखमांची
कोरड्या प्रतीक्षेची, परतीच्या स्वप्नांची
सर पावसाची सर पावसाची !
अन् चाहुल...!
भिजत्या, हुंदडत्या,
डुंबत्या, माखलेल्या, पोरांची
सर पावसाची सर पावसाची !
अन् चाहुल...!
उत्सवांची, हर्षीत नजरेची,
व्रतांची, जप यज्ञांची,
सखीं सवे झुलण्याची
सर पावसाची सर पावसाची !
अन् चाहुल...!
हरी दर्शनाची, साक्षात्काराची,
आयुष्याच्या सत रूपाची
जे शाश्वत फक्त त्याचीच....