संत आधुनिक ( अभंग रचना )

वडिलांचे छ्त्र I मग हरवले॥

मामाकडे गेले I बालपनी ॥१॥

चार मुली पोटी I शेती ही करती ॥

तरी उबगती I संसारात ॥ २॥

सोडी घरदार | संसार त्यागला ॥

विश्वरूप झाला I अंतरंगी ॥३॥

डोई ते खापर l कानात कवडी ॥

फुटकी बांगडी I वेश करी ॥४॥

गुरू मी हो नाही I शिष्य नाही मला ॥

धरिता पायाला l फटकारी ॥ ५ ॥

मिशन स्थापली | उभी धर्मशाळा ॥

गाव होई गोळा | किर्तनात ॥६॥

दिवसभर ते I गाव झाडी सारा ॥

वाहतोय वारा I बदलाचा ॥७॥

गोपाळा गोपाळा I टाळी वाजवती ॥

तल्लीन करती | प्रवचने ॥ ८॥

बाबासाहेबांचे I देतसी दाखले ॥

महत्व जाणले I शिक्षणाचे ॥ ९ ॥

प्रबोधनकार I ठाकरे लिहती ॥

वर्णावी महती | मी हो किती ? ॥१०॥

गाडगेबाबा हो I संत आधुनिक ॥

अवलिया एक I भूमंडळी॥ ११॥