पुरणपोळी
पुरणपोळी
सणावार आला की पुरणपोळी
गुढी पाडव्यासह घरोघरी बेतलेली
अंबाबाईसाठी शुक्रवारची
हमखास आवर्जून ठरलेली
हा हा करीता पोळी
हळूच तव्यावर फुगवायची
अन हळूच अलगद ती वरच्यावर झेलायची
अन परस्पर तुपासवे खायची
काय सुरेख बेत हा आपल्या
सणावारांच्या खाद्याचा
आठव आणतो अजूनही
सुख भोगल्या त्या दिवसांचा
मऊ लुसलुशीत पुरणपोळी
त्यावर साजूक तुपाची धार
गरमागरम ताटात येता
घ्यावा वाटायचा तिचा समाचार
पुरणाची गोडी जरी तोंड पोळी
तरीही भाग्य असायचे प्रत्येकाच्या भाळी
सणावारी जमायची सारी मांदियाळी
वाटायचे घरीच आहे सारी आळी
आता गल्ली गेली, आळी गेली
प्रगतीच्या भडिमारात पोळी दुरावली
आता घरी नांदायला वाटते ती सोकावली
पोळीच झाली आता मॉलवाली
पण आठवण आली तरी
डोळ्यात पाणी आणते
आजही घरोघरी सणावारी निदान
ती अजूनही आवर्जून घरी दिसते..!