लेक

एके दिवशी माझ्या आयुष्यात

सुखाचा, हर्षाचा आला क्षण

लेक माझी लाडाची जन्मली

गोड लेकीमुळे भारावले मन... /१/

इवलीशी परी ती गोंडस

धावते बघा कशी दुडूदुडू

गोजिरे गाल गोबरे फुलवूनी

हसते बघा कशी खुदूखुदू... /२/

आम्हां बाप आणि मुलीचे

आहे बघा सुंदरसे नाते

जणू हिरव्याकंच फांदीवर

असते रम्य लवलवते पाते... /३/

कठोर जरी असतो चेहऱ्याने

तरी बापाचे काळीज मऊ

लेकीच्या सुखासाठी बाप

आता अंगाई लागला गाऊ... /४/

मुलीला पाठवता सासरी

डोळ्यांतून तरळला भाव

बापाच्या डोळ्यांत नेहमी

दिसतो स्वप्नांचाच गाव... /५/