सखे गं
सखे गं
घड्याळाचा गजर वाजला
पक्षांचा किलबिलाट झाला
आठवणींचा गोड तुझ्या गं
हृदयी उमाळा दाटून आला ||१||
दाटून आला ऊर सखे गं
आठवणींचा पूर सखे गं
तिथे कसे गं रहावते तुज
माझ्यापासून दूर सखे गं ||२||
दूर सखे गं राहू नको तू
शून्य नजरेने पाहू नको तू
विरहाग्नीत जाळतेस का
उगाच येथून जाऊ नको तू ||३||
जाऊ नको तू रुसून मजवर
फिदा जाहलो मी तुजवर
घाव घालुनि हृदयावरती
सखे राहशील बघत कुठवर ||४||
कुठवर सखये धीर धरू मी
कुठे मनाला स्थीर करू मी
सांग तुला का असे वाटते
जगात वेडा पीर ठरू मी? ||५||