बाप/ वडिल

माझ्या वडिलाची / माळरान शेती

पिकवितो मोती / घामातून ।।

बापाच्या घराला / लाकडी वासे

पर्ण कुटी भासे / झोपडी ती ।।

वडिलाच्या अंगी / फाटकीच बंडी

हिवाळ्यात थंडी / अंगा लागे ।।

सर्जा राजा संगे / हाकितो नागर

माय बांधावर / वाट पाही ।।

नागराचा फाळ / बोलतो अभंग

बाप माझा दंग / कामा मधी ।।

बापाच्या पायाला / गरीबीचा जाळ

नशिबी दुष्काळ / सदा त्याच्या ।।

माय बोले बापा / बसा सावलीला

विसावा जीवाला / द्यावे थोडा ।।

घाम नवऱ्याचा / पुसे पदराला

भाळी कुंकवाला / जीव लावी ।।

वडिलाच्या पाया / आले भारी फोडं

पाहूनीया रडं / माय माझी ।।