आर्त हाक कुणब्याची...
आर्त हाक कुणब्याची...
आरे ! मी कुठे म्हणालो ? सूर्य , चंद्र तारे माझेच सारे...
मी असेही म्हणालो नाही ते सारं आभाळ माझे नावे करा
मी फक्त एवढंच म्हणालो की माझं हक्काचं मला द्या
तर तुम्ही केवढा कालवा केला ? आरे सारं मीच तर दिलंय ना
मी नसतंच पिकवलं काही रानात तर तुम्ही काय पैसे खाल्ले असते ?
आरे नाहीच मागत फार काही फक्त दोन वेळच जेवण , अंगभर कपडा
चारभिंतीतलं आश्वासक छत , पोराबाळाच्या मनातलं छोटंसं स्वप्न
आरे ! तुमची अब्रू झाकणारे आम्ही ,तुमचे पोशिंदेही आम्हीच विसरलात ?
आरे आमच्या अनेक पिढ्या राबल्या इथे तेव्हा हे दिवस पाहायला मिळालेत
तुम्हाला काय वाटलं तुमच्या हाती सत्ता म्हणजे तुम्ही काहीही कराल ?
एवढं देखील तुमच्या ध्यानात आलं नाही की आम्ही मनातलं आणलं तर..
जागा दाखवून देऊच जरा थोडं थांबा आर्त हाक ह्या कुणब्याची समजून घ्या बाबा
आरे ! आमच्या आयुष्याच अजून किती मातेरं करता ?
आणि पापाचा घडा आणखी किती भरता ...वेळीच सावध व्हा गड्यानो
नाहीतर काय होईल ? तिफण उभी राहील आणि हाती रुम्हन येईल
मग मात्र तुमची पळता भुई थोडी होईल , पायाखालची वाळू तुमची राहणार नाही