कविता - आपले मन
कविता - आपले मन
या मनाची गंमत मोठी, खरेच कळत नाही
कितीही मिळाले तरी आपले मन भरत नाही॥
आशाळभूत नजर सदा भिरभिरत असते
भरले पोट जरी, पुन्हा पुन्हा खावेसे वाटते||
त्याला मिळाले ,मला का बरे मिळत नाही
कितीही मिळाले तरी आपले मन भरत नाही||
चार भिंतीच्या घरात, हे मन काही रमत नाही
नाक खुपसण्या शिवाय याला करमत नाही||
सुख दुसऱ्याचे तसे याला पाहवतही नाही
कितीही मिळाले तरी आपले मन भरत नाही||
मर्यादा स्वतःची किती? लायकी किती आहे?
या भानगडीत मन कधी पडतही नाही||
स्वताच्या चुका कधी चुकूनही शोधत नाही
कितीही मिळाले तरी आपले मन भरत नाही||