असा झिम्माड पाऊस
असा झिम्माड पाऊस
पावसाचा थेंब
झिरपला आत आत
आता उगवलं कोंभ
धरित्रीच्या उदरात
पावसाचा थेंब
जसा टपोरा मोती
बिजलीचा ताशा
वाऱ्याचा सुर साथी
भेगाळल्या भुई ने
टाकला हुंकार
बिजलीची रुद्रवीणा
आणि पावसाचा झंकार
कधी तळ्यात कधी मळ्यात
कधी बरसला डोळ्यात
आस प्रियाच्या येण्याची
जागविली सारी रात
असा झिम्माड पाऊस
असे ओलेते अंगण
सय आली राजसाची
गेले कोमेजून मन
पावसाचा धुंद गंध
रातराणी मंद मंद
नभ झाले कुंद कुंद
तुझ्या प्रीतीचा छंद
पावसाची सर चिंब
गेली माळून मोगरा
भिजलेले अंग अंग
देह झाला लाजरा
पावसाची सर चिंब
मी राधा मीच श्रीरंग
चढला प्रेमाचा रंग
मनमोर बावरा